Поранешниот пакистански премиер Имран Кан е осуден на 14 години затвор во случај на корупција поврзан со продажба на земјиште, изјави неговиот адвокат, пренесе Sky News. Пресудата дојде по обвинувањата за земање мито при продажба на земјиште за имотен магнат во вредност од 190 милиони фунти (250 милиони евра).
Случајот е поврзан со Фондацијата Ал Кадир, која Кан и неговата сопруга Бушра Биби ја основаа додека тој беше на функцијата. Обвинителите тврдат дека фондацијата била фронт за поранешниот премиер. Пакистанската партија Техрик-е-Инсаф (ПТИ) на Кан вели дека земјиштето не било за лична корист, туку за духовна образовна институција.
72-годишниот Кан, кој исто така беше победник на Светскиот куп во крикет, беше сменет од функцијата во 2022 година. Тој е во затвор од август 2023 година и се соочува со повеќе од 150 кривични случаи.
Бушра Биби, исто така, беше осудена во корупциски случај со продажба на земјиште. Локалниот медиум Гео њуз објави дека таа била приведена набргу по пресудата, откако била ослободена со кауција. Последната пресуда на Кан доаѓа само еден ден откако ПТИ одржа официјални разговори за помирување со владата.