Поранешниот командант на 58-та руска армија – Иван Попов, е уапсен под сомнение за „измама од големи размери“, објави денеска државната новинска агенција ТАСС.
Агенцијата пишува дека воениот суд му одредил притвор на генерал-мајор Попов.
Попов е „уапсен под сомнение за измама“, јави руската државна новинска агенција ТАСС, повикувајќи се на портпарол на органите за спроведување на законот, пишува Newsweek.
Овој висок руски командант ја критикуваше руската војска и нејзините воени напори во Украина, објавија во вторникот руските државни медиуми.
Попов минатата година изјави дека бил разрешен откако на военото раководство му ја кажал вистината за тогашната страшна ситуација во која војниците биле на линијата на фронтот во Украина.
Попов, чиј воен прекар беше Спартак и кој командуваше со руските единици на југот на Украина, како главен проблем ја истакна смртта на руските војници како резултат на украинската артилерија. Тој посочи дека војниците немаат соодветно оружје и извидувачки системи што би им овозможиле да се спротистават.
Во видеото објавено на социјалните мрежи од рускиот пратеник и поранешен воен командант Андреј Гуруљов, Попов рече дека бил отпуштен од поранешниот министер за одбрана Сергеј Шојгу, откако изразил загриженост кај руската воена команда.