Централна и јужна Србија беше зафатена со обилни дождови кои предизвикаа излевање на речните корита и поплави.
Во 12 општини е прогласена вонредна состојба, каде што се излеани реките и поплавени голем број села.
Спасувачките екипи и тимовите за вонредни состојби се на терен, а на некои места е ангажирана и армијата.
Како што пренесуваат локалните медиуми, голема штета има во Краљево, каде што се поплавени околу 400 куќи и објекти, оштетени се или целосно уништени 16 мостови, прекинат е сообраќајот на 20 патни правци.
Особено катастрофална е состојбата во местото Сирча, каде што по улиците има угинати животни, а недостигаат и животни намирници.
Во општина Лучани водата се повлекува, а наредните денови ќе биде утврдена штетата во Драгачево, каде што се појави и лизгање на земјиштето.
Според метеоролозите, за една ноќ паднало дожд колку што вообичаено паѓа за еден месец.