Полицијата спаси двајца малолетници кои со чамец се изгубиле во Охридско Езеро

Министерство за внатрешни работи соопшти дека денес во утринските часови се спасени двајца малолетници кои во водите на Охридското Езеро со чамец неконтролирано се движеле кон државната граница со Албанија. Чамецот според пријавите од полицијата бил забележан на два километри наспроти брегот на „Женска плажа“ во Струга, а бил пронајден на еден километар нспроти хотелот „Изгрев“.

„Денеска  во 09.35 часот во Полициската станица за граничен надзор „Охридско Езеро“, од веслачки клуб „Црн Дрим“ од Струга било пријавено дека во водите на Охридското Езеро, на два километри од брегот, наспроти „Женска плажа“, неконтролирано се оддалечува чамец за веслање со двајца малолетници во правец на државната граница со Република Албанија“, соопшти МВР.

Од МВР велат дека според пријавеното, членови на веслачкиот клуб се доближиле до чамецот, но поради силниот ветер не можеле да го извлечат на брегот.

„По преземени мерки, полициски службеници од Полициската станица за граничен надзор „Охридско Езеро“, Полициската станица за граничен надзор „Франгово“ и членови на веслачкиот клуб го пронашле чамецот на еден километар наспроти хотел „Изгрев“ во Струга, по што со службен пловен објект чамецот со малолетниците, кои се во добра здравствена состојба, безбедно се пренесени до брегот на езерото“, соопшти МВР.