Првата замисла за атрактивното земјиште на кое, според обвинението за „Плацевите на Водно“, екс премиерот Никола Груевски планирал да гради барокен замок, била да се продаде и да се ќари милион евра. Но откако потенцијалниот купувач не се „фатил за јадицата“, наводно Груевски се откажал од првичниот план и решил да гради.
Ова земјиште од околу 2.700 квадратни метри се наоѓа во близина на резиденцијата на Вилма Трајковска на Водно, а на јавно наддавање го купила фирмата „ИТК Инженеринг“. Секретарката на Александар Ивановски-Теранова, Татјана Стојановска, денеска на судското рочиште, сведочеше дека фирмата, во која таа се јавува како управител, била основана токму за оваа цел, односно да учествува на тендер за да се купи градежно земјиште на Водно.
Слично беше сведочењето и на Алек Теранова, кој истакна дека логички заклучил дека земјиштето се купува за Груевски, бидејќи бил замолен преку фирмата да купи и еден од соседните станови во зградата на Груевски на Бихачка, за да може во иднина да го користи.
И екс министерот Миле Јанакисеки, во своето сведочење за случајот, истакна дека за оваа земјиште го контактирал Алек Ивановски и го прашувал за законската постапка за јавното наддавање. Потоа и успеал да ја купи парцелата.
Според информациите на „Фокус“ парцелата е купена за сума од 119.000 евра, или за еден квадрат биле платени околу 44 евра.
Според она пак што го откри Јанакиески, Груевски го распрашувал и за оваа парцела и го замолил како што рече, да анимира потенцијални инвеститори доколку се спремни да вложат на оваа локација. Тој посочи дека пазарната цена на земјиштето била 400 евра за квадрат, а за евентуална купопродажба зборувал со бизнисменот Илија Гечев.
-Зборев со него за инвестирање на оваа локација. Гечев дојде на мое барање. Ме замоли Груевски да анимирам потенцијални инвеститори, знаејќи дека е економски добро ситуиран. Подоцна што се случи не знам, рече Јанакиески.
Токму Гечев денеска се појави во судница и потврди дека му била понудена атрактивната парцела.
-Ми се јави Миле и ми рече има интересна локацина до резиденцијата на Вилма Трајковска. Потоа бев упатен да се видам со Ерол Хасан и да разговараме за тој плац. Се видовме и ми рече дека плацот е за продажба. Разговорот заврши за кратко, бидејќи јас не се интересирав за купување, ниту пак сакав да градам таму, рече бизнисменот, кој додаде дека тогаш слушнал дека земјиштето е на, како што рече, фамилијата од Панделевци, на Пелистерка.
Но она што е интересно е дека на бизнисменот му била понудено земјиштето да го купи засоколу 1,3 милиони евра, или за десет пати поголема цена од онаа кога било купено на јавно наддавање.
Според тезата на Обвинителството, пак, откако идејата за продажба не се реализирала, Груевски решил да гради барокен замок, за што на едно од судењата беше презентирот планот за градба.
Од скицата можеше да се забележи дека станува збор за грандиозен објект, од два ката, а над нив се простира огромен балкон. Исто така од презентираниот доказ можеше да се види и вцртан голем базен. Покрај големината на објектот, во очи паѓа барокниот стил, како и огромните столбови и скали кои водат кон влезот.
Општина Центар одобрението за градба го издало во октомври 2011 година, односно за изградба на резиденцијален објект по барање на фирмата ИТК инженеринг, а според обвинителството таен сопственик требало да биде Груевски. Во 2020 година пак решението за градба е прогласено за ништовно, бидејќи не било започнато со градба во предвидениот рок, иако биле платени комуналии од 3,5 милиони денари.
Компанијата, пак, која е официјален сопственик на земјиштето, ИТК Инженеринг, според податоците од Централен регистер, е во постапка на бришење. Инаку истата фирма не е деловно активна и со години нема остварено добивка.
Валентина Вурмо