Раководството на СДС и ДУИ во МЕПСО дозволиле фирмата Шанси Инвест да биде фирма на која ќе и исплатат аванс од 20%, за набавка на уредот за корекција на напонски профил, иако истата од 2019 до 2023 година нема приходи, изјави пратеникот на ВМРО-ДПМНЕ, Бране Петрушевски.
„Шанси инвест првите приходи ги има во 2023 година, и тоа верувале или не само 18.000 денари.
Истата оваа Шанси инвест во 2024 година добива тендер од МЕПСО под СДС и ДУИ од 10 милиони евра, сврзана со Далековод АД Загреб, кои очигледно ги користале за референци.
И не само што МЕПСО доделило набавка од 10 милиони евра на Конзорциумот меѓу Шанси инвест и Далековод АД Загреб, туку и во договорот се согласило аванс од 20% да исплати на Шанси инвест, фирма која 5 години нема никаков приход. МЕПСО под СДС и ДУИ се согласиле да префрлат 1.87 милиони евра на Шанси инвест како аванс“ рече Петрушевски.
Тој го повика јавното обвинителство да не чека и веднаш да отвори истрага. „Очекуваме одговорност“ порача Петрушевски.