Претседателот на НСДП, Тито Петковски, смета Зоран Заев не треба да се повлекува после поразот на локалните избори, бидејќи пред само една година оваа коалиција добила 4-годишен мандат на парламентарни избори. Кога веќе Заев решил да се повлече, посочува Петковски, тогаш треба да го наследи кадар од СДСМ, бидејќи станува збор за политичка влада.
-Владата е стабилна. Доколку опозицијата смета дека нема простор за консолидација, тогаш нека предложи да се гласа за доверба и ќе биде јасно за три дена. Не се во состојба да се обезбеди тоа. За една година не се троши кредибилитетот на владата. Еве на пример, ако идеме на предвремени избори и опозицијата изгуби, дали треба да ги повториме и локалните избори? – рече Петковски на Канал 5.
Тој додава дека има сериозни најави за поголемо парламентарно мнозинство со поддршка од Алтернатива, која, заедно со ДУИ, БЕСА и ДПА, според Петковски, треба да го усогласат новиот премиер. После изборот на нов премиер, смета лидерот на НСДП, треба да се влезе во процес на избор на нов лидер во СДСМ.