Комисијата за следење на изборни нерегуларности информира дека примила неколку известувања за евентуални изборни нерегуларности сторени на подрачјето на Скопје.
Во соопштението се наведува дека е добиена пријава оти засега непознати лица со две патнички моторни возила вршат изборен поткуп во Топаана и Шуто Оризари.
Друга пријава, пак, укажува дека околу 09:35 часот во близина на ЈДГУ „Кочо Рацин“ на ул.„Борка Талески“ на девет возила од надворешна страна на стаклата е залепена бројка од кандидат за градоначалник.
Потоа, по лотус добиено е известување од страна на Оперативниот штаб, доставено од страна на Амбасада на САД во кое известуваат дека едно лице од политичка партија, се обратило до нив и споделило информација дека 83 лица кои биле повеќекратно осудени сторители на кривични дела и се на слобода, добиле огнено оружје со цел попречување на изборниот процес.
Исто така, во известувањето стои дека друго лице – познат сторител на кривични дела, поседува оружје и дека на денот на гласањето ќе изврши кривични дела со кои ќе го загрози животот и телото на лица – членови на политичка партија.
Во однос на овие наводи се преземаат мерки на проверка. Инаку, Комисијата посочува дека и претходните денови постапувала по сознанија за евентуално сторени кривични дела поврзани со организирањето и спроведување на локалните избори.
„Дадени се задолженија до основните јавни обвинителства за итно постапување, односно за формирање предмети и преземање на сите дејствија за утврдување на релевантни факти од кои зависи правилната примена на Кривичниот законик“, велат од таму.
Дежурен јавен обвинител од скопското обвинитeлство е присутен во седиштето на СВР Скопје каде заедно со Штабот во рамките на оперативна акција Избори 2021 година се следат сите настани поврзани со неправилности за локалните избори.