Украинскиот министер за надворешни работи Дмитро Кулеба го критикуваше повикот на папата Франциск за Украина да преговара со Русија две години по почетокот на инвазијата и порача дека никогаш нема да се предадат откако папата рече дека Киев треба „да има храброст да го подигне белото знаме“.
-Нашето знаме е жолто-сино. Ова е знамето со кое живееме, умираме и победуваме. Никогаш нема да подигнеме друго знаме, изјави украинскиот министер за надворешни работи Дмитро Кулеба на социјалните мрежи.
Папата Франциско предизвика гнев во Киев откако во интервју објавено во саботата рече дека Украина треба да преговара со Русија, која зазеде големи делови од нејзината територија за време на војната.
Украина вети дека нема да се откаже од својата територија, но затоа зборовите на папата одекнаа во Киев.
-Кога ќе видите дека сте поразени, дека работите не функционираат, имајте храброст да преговарате, рече папата.
Кулеба го повика Франциск да застане „на страната на доброто“ и да не ги става завојуваните страни „на иста основа и тоа да го нарекува „преговори“.
Во неделата директорот на Канцеларијата за печат на Ватикан, Матео Бруни изјави дека Папата Франциск не повикува Украина да се предаде, туку на прекин на огнот и храброст во преговорите.
-Папата го користи терминот „бело знаме“ и го повторува впечатокот предложен од интервјуерот, за да укаже на прекин на непријателствата и примирје постигнато преку храброст во преговорите, рече Бруни за интервјуто на папата Франциск.
-Во други делови од интервјуто, зборувајќи за друга конфликтна ситуација, но мислејќи на каква било воена ситуација, Папата јасно рече: „Преговорите никогаш не се предаваат“, додаде Бруни.