По околу две недели во Скопје ќе се одржи големиот солистички концерт на Калиопи, закажан на 19-ти октомври во Арена Борис Трајковски.
Започна одбројувањето на последните денови до големиот концерт на Калиопи во Скопје. Нешто повеќе од две недели не делат до овој спектакл, а како што деновите поминуваат, така и возбудата расте, и кај публиката, но и кај Калиопи.
19 октомври е опасно блиску, а истиот тој 19 октомври е совршен датум за фантастичен солистички концерт на Калиопи во ,,Арена Борис Трајковски”.
Од нејзиниот тим информираат дека пробите за настанот биле во тек, а воодушевувањето- взаемно.
– Ова со сигурност ќе биде еден од најдобрите концерти кои некогаш му се случиле на Скопје, концерт богат со аудио-визуелни ефекти, неверојатни звуци и енергија. Калиопи ветува дека на 19-ти октомври на своите обожаватели ќе им приреди една незаборавна музичка вечер, известуваат од организацијата на концертот.
Калиопи пак, вели дека за неа ова ќе биде највеличенствениот концерт кој го имала во кариерата.
– Не можам да ја опишам возбудата која ме обзема деновиве пред големиот концерт во Скопје. Имам чувство дека Арената Борис Трајковски ќе биде премала за да ги собере сите емоции, вечерта, на 19-ти октомври.
Многу сум среќна што големиот јубилеј ќе биде крунисан со, за мене, најголемиот и највеличенствен концерт во мојата кариера, токму овде, во Скопје.
Подготвуваме спектакуларно музичко и визуелно доживување за публиката и сите со нетрпение го чекаме денот на концертот. Ќе биде тоа ноќ која сите ќе ја паметиме долго, долго, вели Калиопи.
Влезниците за настанот се пуштени во продажба со почетна цена од 600 денари, па се до 11.000 за пакет од четири влезници и шише алкохолен пијалак.
Вики Клинчарова