Осумчлено семејство е убиено во израелски напад врз централниот дел на Појасот Газа, соопштија денеска палестинските медицински претставници.
Во нападот во Газа доцна во саботата, беше погодена куќа во бегалскиот камп Нусајрат, при што загинаа родителите и нивните шест деца, на возраст од 8 до 23 години, објави болницата Ал Акса во блискиот Деир ал-Балах, каде што беа однесени телата.
Во северниот дел на Газа, израелските воздушни и копнени сили ја нападнаа Џабалија, каде што милитантите соопштија дека армијата се прегрупирала.
Една година по војната со Хамас, Израел продолжува да извршува речиси секојдневни напади врз милитантите во Газа. Војската вели дека се обидува да избегне смртни случаи на цивили и ги обвинува Хамас и другите вооружени групи за нивната смрт бидејќи дејствуваат во густо населени области.
Израел нареди целосна евакуација на северот на Газа. Се проценува дека околу 400.000 луѓе останале на северот по првичната евакуација наредена во првите недели од војната. Палестинците стравуваат дека Израел има намера трајно да го депопулира северот со цел да воспостави воени бази или еврејски населби.
