Министерот за надворешни работи Бујар Османи денес учествуваше на Улпиана форумот во Приштина, на панелот насловен „Миграција преку ангажман на дијаспората: нова димензија за дипломатска и развојна соработка“
Османи нагласи дека „единствен начин да се спречи заминувањето на младите е преку намалување на расколот во економските и социјални прилики во Северна Македонија споредено со западните земји, што може да се обезбеди преку членството во ЕУ“, посочувајќи на фактот дека земји како Шпанија и Португалија пред членството во ЕУ имале значително поголем одлив на работна сила и млади.
Трендот во овие две земји е променет со членството во Унијата, истакна тој.
Османи се осврна и на проектите на МНР во интерес на дијаспората. Го издвои проектот, МКарта, кој во суштина „создава вредна мрежа на поединци кои се најдобри во своите професии и кои со тоа оставиле трага во новото опкружување во кое се успешно интегрирани и служат како дополнителен мост на соработка помеѓу дијаспората и Северна Македонија.
Османи информираше дека Северна Македонија на последниот попис по првпат овозможила попис на дијаспората, но податоците за нејзиното лоцирање не може да се користат за креирање долгорочни политики.