Грузискиот премиер и член на владејачката партија Грузиски сон, Иракли Кобахидзе, прогласи „премоќна“ изборна победа, отфрлајќи ги сите обвинувања за измама и насилство во изборниот процес. Премиерот призна дека имало неправилности, но тврди дека тие биле ограничени на неколку избирачки места од вкупно над 3.000.
Официјалните резултати покажуваат дека Грузискиот сон обезбеди мнозинство со 54 отсто од гласовите, и покрај излезните анкети на опозициските ТВ канали кои покажаа победа на опозициските партии. Некои набљудувачи на изборите сугерираат дека нерегуларностите можеле да влијаат на резултатите. Меѓу нив споменаа и наводно заплашување на гласачи, поткуп, вметнување ливчиња итн.
Грузиската претседателка Саломе Зурабичвили, која ги застапува прозападните ставови, ги осуди изборите за „целосно фалсификување“ на гласовите и ги повика поддржувачите на опозицијата да се соберат пред парламентот. Европската унија, загрижена за демократското назадување на Грузија и приближувањето кон Русија, привремено го прекина процесот на нејзино приближување кон ЕУ.
Во исто време, унгарскиот премиер Виктор Орбан, кој често изразува пријателски односи со Тбилиси, беше меѓу првите што му честиташе на „Грузискиот сон“ за изборната победа и го најави своето доаѓање во Грузија во наредните денови.
Шефот на Европскиот совет на лидерите на ЕУ, Шарл Мишел, рече дека „наводните неправилности мора сериозно да се разјаснат и да се решат“ и повика на брза, транспарентна и независна истрага.
Четири опозициски групи одбија да ги признаат изборните резултати, осудувајќи ги како лажни и ја обвинија владејачката партија за кражба на гласови. Опкружен со опозициски лидери, грузиската претседателка изјави дека изборите не можат да се признаат и ја обвини Русија за мешање во изборите.