Општина Аеродром соопшти дека ги прифатиле најголем дел од забелешките на граѓаните за Деталниот урбанистички план Лисиче и дека подготвуваат втора верзија за планот.
„Веќе тече постапката за ревидирање на првата и изработка на втора ревидирана верзија на Деталниот урбанистички план за дел од населбата Лисиче. Комисијата за урбанизам во општината ги разгледа и прифати најголем дел од забелешките кои граѓаните ги доставија во рамки на јавната анкета“, соопшти Општина Аеродром.
Од општината велат дека по завршување на оваа фаза, планерската фирма веќе изработува, а тие наскоро ќе ја објави новата ревидирана верзија на Деталниот урбанистички план.
„Планот како и досега во рамките на отворена и транспарентна постапка ќе биде изложен на јавна анкета и истиот ќе биде презентиран пред граѓаните и медиумите“, соопшти Општина Аеродром.
Од Општината велат дека интересот на граѓаните е приоритет во носењето на сите одлуки, вклучително и оние од областа на урбанизмот.
„Одлуките кои ги носи Општина Аеродром имаат единствена цел, решавање на клучните проблеми и подигнување на квалитетот на живеење во општината. Финалната верзија на Деталниот урбанистички план за овој дел од општината ќе биде направен, во согласност со потребите и барањата на граѓаните“, соопшти Општина Аеродром.