Јавното обвинителство Скопје побара притвор за Скопјанецот кој пред два дена со нож ја напдана својата сестра во дворот во семејната куќа.
Од Основното јавно обвинителство Скопје соопштија дека донеле наредба за спроведување истражна постапка против 55-годишен жител на селото Волково осомничен за кривично дело – тешка телесна повреда од член 131 став 3 од Кривичниот законик.
„На 15 јуни, во дворот од семејна куќа во Волково, осомничениот тешко го нарушил здравјето на својата сестра и предизвикал нагрденост. Осомничениот најпрво започнал вербална расправија на висок тон, упатувајќи навредливи зборови кон оштетената, нејзината ќерка и уште двајца сведоци кои работеле во дворот. Потоа станал агресивен и им се заканил да престанат, а за кратко се вратил во дворот со нож во раката и се упатил кон внуката. Нејзината мајка се обидувала да ја смири ситуацијата и во моментот кога осомничениот замавнал со ножот, таа застанала пред ќерката за да ја заштити, па била прободена во левата страна од лицето во пределот кон слепоочницата“, соопшти ОЈО Скопје.
Од Обвинителството информираат дека постојат околности што укажуваат на опасност од криење и бегство, и поради оправдан страв дека осомничениот ќе ја попречува истрагата со влијание врз сведоците и вештаците побарале да му се одреди мерка притвор.
„Поради претходно наведеното како и поради особени околности кои го оправдуваат стравот дека ќе го повтори кривичното дело или ќе стори кривично дело со кое се заканува, јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот“, соопшти ОЈО Скопје.