Расправата за статусот на Охридскиот регион во УНЕСКО се очекува денеска да се најде на дневниот ред на годинешната 44. сесија на Комитетот за светско наследство при Организација на ОН за образование, наука и култура (УНЕСКО), што се одржува во кинескиот град Фуџоу.
До расправата за состојбите во Охридскиот регион како заштитено природно и културно наследство од исклучителна универзална вредност, според предвидениот дневен ред од работата на Комитетот има уште пет точки, така што веројатно одлуката по нацрт-извештајот и идниот статус на заштитеното културно и природно наследство ќе биде познат во текот на денот.
Што се однесува на нацрт-верзијата на самата одлука, Центарот за светско наследство претходно ги нотираше слабостите во односот на државата, институциите, властите на национално и локално ниво кон Охридското Езеро и градот Охрид како природно односно културно наследство прогласени за светско богатство и се констатира несоодветниот одговор за дадените забелешки. Оттука, Центарот му предложи на Комитетот регионот да биде впишан на листата на УНЕСКО со светски наследства во опасност.
Претходно, 34 организации и граѓански здруженија од Северна Македонија и Албанија испратија писмо до Комитетот за светско наследство во кое бараат УНЕСКО да го впише Охридскиот регион на Листата на светски наследства во опасност.
Епилогот од денешната расправа е извесен, голема е веројатноста Охрид и езерото да бидат поместени на листата светски вредности во опасност. Тоа не значи нивно бришење од листата на заштитени природни и културни наследства на УНЕСКО, туку очекувана разврска на она на што беше укажувано години наназад од страна на експертите и критичката јавност, како несоодветно однесување кон брендот признаен од светот. Дел од експертите се уште се на став дека можеби тоа е вистинскиот начин што ќе отвори повеќе можности државата, институциите и градот да добијат помош, искуства и механизми од Светската организација во наредните активности за надминување на проблемите што впрочем и доведоа до сегашната состојба.