Од утре, 27 мај, започнува исплатата на пензиите, која според одлуката на Владата, ќе биде етапно во периодот до 1 јуни, во зависност од висината на пензиите.
Како што соопшти денеска Министерство за труд и социјална политика, подигнувањето на пензиите преку филијалите и експозитурите на банките за пензионерите кои не користат картички ќе се реализира во четири групи, според висината на пензијата.
Во среда, на 27.05.2020 година ќе се врши исплата на пензии до 11.000 денари, во четврток, на 28.05.2020 на пензии од 11 001 до 14 000 денари, во петок, на 29.05.2020 на пензии од 14 001 до 18 000 денари, додека во понеделник, на 01.06.2020, ќе се реализира исплатата на пензии повисоки од 18 000 денари.
Според Министерството, пензионерите кои користат платежна картичка поврзана со сметката на која се префрлува пензијата, со парите можат да располагаат од утре.
Целта на етапната исплата на пензиите е поголема заштита на пензионерите во услови на опасност од коронавирусот, велат од Министерството и апелираат до пензионерите да се придржуваат до распоредот за исплати, да носат лична заштитна опрема којашто ги покрива устата и носот како и да држат растојание од најмалку два метра при чекање ред пред и внатре во банките.