Обвинителот Јован Цветановски од Вишото јавно обвинителство побара од судскиот совет во Апелациски суд – Скопје да се преиначи одлуката на Кривичниот суд и на актерот Владо Јовановски, осомничени за тероризам и уставно загрозување за неговото учество во настаните од 27-ми април, да му се укине мерката притвор, а да му се одреди поблага мерка.
На денешната јавна седница во Апелација, на која се разгледуваат жалбите на неколкумина осомничени, обвинителот Цветановски предложи актерот да биде пуштен од притвор и да му се изрече поблага мерка – обезбедување присуство. Според Цветановски, Советот на Основен суд Скопје 1 при продолжувањето на притворот погрешно ја утврдил фактичката состојба.
За разлика од случајот на Јовановски, претставниците на Вишото јавно обвинителство побараа од судскиот совет да ги потврдат мерките за продолжување на притворите на Оливер Поповски од Шестата управа и на Горан Ѓошевски, шеф на обезбедувањето на поранешниот претседател на Собранието, Трајко Вељаноски.