За новиот директор на Агенцијата за национална безбедност (АНБ), Бојан Христовски, за кого на Фејсбук стоеше дека е политичар, сега има промена.
Во секцијата вовед (Intro) на Фејсбук-профилот на Христовски сега стои дека тој е „јавна личност“ (Public figure).
Инаку Христовски вчера на владина седница беше именуван за нов директор на Агенцијата задолжена за безбедност и контраразузнавање.
Тој на позицијата го наследува Зарко Милошевски, кому не му е истечен мандатот, туку е разрешен од функцијата, која ја извршуваше неполни две години.
Од Владата изјавија дека Бојан Христовски од 2023 година не е член на партија, откако си поднел оставка по неговото враќање на работа во Министерството за внатрешни работи.
Сепак, на неговиот Фејсбук-профил забележлива е активност и пропагирање во прилог на партијата. На 1 септември годинава тој го честита петтиот роденден на Агенцијата за национална безбедност, наведувајќи дека тој е последен.
„Нека е честит петтиот и последен роденден на Агенцијата за национална безбедност! Шупливите темели на формирањето на новата Агенција во старт го зацртаа и краткиот рок на траење! Дојде време на темелни реформи и нов почеток“ – пишува Христовски во објавата.
Само месец и половина подоцна тој е назначен за директор на истата таа АНБ.
Она предизвикува контроверзии, е партиско-политичкиот ангажман на Бојан Христовски, за што сведочат неговите објави на Фејсбук и други јавни настапи.
Законот за АНБ во членот 10, во кој се пропишани условите за тоа кој може да биде директор на Агенцијата, е јасен и вели:
„Да не е член на политичка партија или член на органи и тела на политичка партија“.
Христовски, според Владата, формално не е во конфликт со овој услов, но неизбежен е впечатокот дека неговите јавно декларирани ставови, па и во последните неколку недели, се во корелација со политиките и потезите на ВМРО-ДПМНЕ.
