Се зголемува бројот на заразени лица со новиот коронавирус во Словенија, јави дописникот на МИА од Љубљана.
Според Министерството за здравство, вкупниот број на заразени достигна 47 лица. Дел од ново заразените се вработени во Универзитетскиот клинички центар во Љубљана. Најмногу се вработени на Клиниката за гинекологија, а има и еден потврден случај кај лекар на Клиниката за стоматологија.
Поради се поголем број на заразен медицински персонал на клиниките во Љубљана, забранети се сите посети на болни, а се откажуваат и редовните прегледи кои не се третираат како итни.
Поради зголемениот број заразени лица, воведени се ригорозни медицински прегледи на сите гранични премини.
Вкупниот број на лица заразени од новиот коронавирус во Грција денеска се искачи на 99, откако Министерството за здравство соопшти дека се потврдени 10 нови случаи, јави дописничката на МИА од Атина.
Од 99. лица, 68 се во домашна изолација, 29 се хоспитализирани во болници во Атина, Солун, Патра и на Лезбос, а двајца се на Одделенијата за интензивна нега.
Од позитивните случаи, 95 се Грци, а четворица се странски државјани.
Паралелно, претставникот за Ковид-19 од Министерството за здравство на Грција, професорот Сотирис Циодра, соопшти дека во тек е постапката за пронаоѓање на контактите на новите 10 потврдени случаи.