Драмата со најдобриот свтески тенисер Новак Ѓоковиќ продолжува и денес, откако неговите адвокати објавиле документи според кои тој добил прв позитивен ПЦР тест за Ковид-19 на 16-ти декември, што било услов да добие влез во Австралија без вакцинација.
Според објавените документи, 14 дена откако бил позитивен, тенисерот немал треска или респираторни симптоми на корона вирус. Инаку, Ѓоковиќ не објави дека на 16-ти декември се заразил со Ковид-19.
Но, доколку тој навистина го добил првиот позитивен тест на 16-ти декември, се поставува логичното прашање, зошто не седел во изолација, туку наредниот ден, на 17-ти декември, заедно со сопругата Јелена беше на настан во музејот на ПТТ во Србија.
Како што може да се види на страницата на ЈП Пошта на Србија, Ѓоковиќ е гостин во музејот на настан каде се промовирала поштенска марка со неговиот лик.
-Веруваме дека оваа единствена поштенска марка нема само да ги забележи и зачува неговите успеси за идните генерации, туку и ќе им даде поттик на младите луѓе да го даваат својот максимум во сите сфери на животот. Со благодарност до Новак за честа која ни ја укажа со денешното присуство на свеченоста во ПТТ музејот, во име на вработените во поштата, му посакувам многу успех во кариерата – порача Зоран Ѓорѓевиќ, в.д. директор на Пошта на Србија на 17-ти декември.
На настанот, кој се одржал во затворена просторија, односно во музејот, се гледа дека ниту Ѓоковиќ, ниту пак било кој од присутните носи заштитна маска.
Случајот со тенисерот е топ тема во светот, и бурни се реакциите на оние кои сметаат дека без оглед на општествениот статус, богатството и популарноста, правилата треба да важат исто за сите. Потсетуваат дека милиони луѓе минаа долг период во карантин, а многумина не отидоа ниту на погреб на свои блиски поради ковид процедурите.
Од друга страна пак, реагираат и оние кои сметаат дека за Ѓоковиќ треба да се направи исклучок и да му биде дозволен влез со цел да игра на Австралијан опен. Тенисерот е во имиграциски притвор, а во понеделник е закажана итна судска постапка на која ќе биде познато дали ќе биде депортиран од Австралија.
Во јуни пак, 2020 година, Ѓоковиќ објави дека со сопругата се позитивни на вирусот, по враќањето од тенискиот турнир ,,Адрија тур” чиј организатор беше тој. Турнирот се покажа како ковид жариште, бидејќи тенисерите се дружеа со голем број на луѓе, и со стотици деца, по што Новак јавно се извини и кажа дека му е жал за секој поединечен случај на инфекција.
Вики Клинчарова