По завршната трибина од кампањата „На прав пат“ што се одржа викендoв во Скопје, владејачкиот СДСМ најави нова кампања насловена „Агенда 20/24“, која ќе стартува уште вечерва во Музејот на град Скопје на тема „Агенда-иновитавива“. Како што изјави партискиот генерален секретар Љупчо Николовски, во наредниот период ќе се одржат 11 тематско-проблемски трибини, како столбови на кои, според него, ќе се потпира програмата на владејачката партија на престојните парламентарни избори.
-Партиските комисии и сите партиски тела, заедно со граѓаните, надворешни експерти и НВО, веќе работат на новата програма на СДСМ и на Владата. Се собираат предлози од граѓаните. Досега добивме околу четири илјади предлози, од кои поголем дел се издржани и ќе бидат вклучени во новата програма. Владата на СДСМ постигна големи успеси во изминатиот период, посебно во економијата, социјалната политика, земјоделството – рече Николовски, додавајќи дека околу 6.000 активисти на СДСМ се на терен од врата на врата.