„Нема да има слобода, додека нема слободни жени“, „Бараме оставки“, „Убијци“, „Не ви се плашиме“, Правда за Ивана, „Правда за Катја“, „Правда за Росица“, беа само дела од паролите и извиците кои граѓаните во огромен број ги испратија како пораки пред зградатата на Владата.
Под мотото „Нема да нѐснема“, голем број граѓани маршираа низ скопските улици со транспаренти „Нема слобода без слободни жени“, „Многу мајки трпат сѐ бидејќи немаат каде“, „Не чекајте крв, постапете веднаш“, истакнувајќи дека „институционалното потфрлање и избегнување одговорност жената го плаќа со своето здравје, живот и достоинствено постоење“.
Учесниците маршираа во чест на сите паднати и храбри жени кои си го посветиле животот на оваа борба, за сите жени кои изминатава година не дочекаа правда, сите оние кои требаше да бидат спасени и за сите кои не можат или не им е дозволено да излезат на марш.
МВР денеска соопшти дека во последните две недели поднесе 21 кривична пријава за сторени 25 кривични дела во врска со семејно насилство, од кои шест се поднесени по брза постапка. Покрај ова, на подрачјето на СВР Скопје се поднесени пет кривични пријави за родово базирано насилство, од кои три за загрозување на сигурноста и две за демнење. Притоа се изречени пет мерки притвор, како и една мерка претпазливост на подрачјето на СВР Скопје.