Малто неготинско село Војшанци се подготвува за голем настан на први август, Вилиџ Фестивал Војшанци, кој годинава ќе се одржи за првпат, а се планира да стане традиција, која секоја година ќе носи голем број на посетители од сите краеви.
Зад фестивалот стои Авангард Продукција, а Александар Додев, кој живее во Војшанци и е дел од продукцијата, за ,,Фокус” вели дека идејата за ваква манифестација му се родила пред неколку години, но дури сега, со помош и поддршка на кавадаречкиот градоначалник Митко Јанчев, успеал да ја оствари својата замисла.
-Јас сум дел од продукцијата, и се занимавам со угостителство повеќе од 15 години. Фестивалот го планирав неколку години нанзад, а намерата е да се покаже дека и во Војшанци може да се живее убаво.
Инаку, овде има околу 400 жители, има доста млади луѓе, и ако се има добри идеји, ништо не е тешко, животот може да биде исполнет со квалитетни содржини. Значи, целта ни е да оставиме еден белег, нешто по кое ќе биде препознатливо Војшанци, да порачаме дека и во мало населено место може да се има добар живот.
Поради финансиски причини фестивалот не можеше да се реализира порано, но откако мојата идеја му ја соопштив на кавадаречкиот градоначалник Митко Јанчев, кој е сопственик на компанијата Кожувчанка, тој без двоумење прифати да биде генерален спонзор на настанот и не поддржа.
Значи, неговата компанија Кожувчанка е главниот поддржувач, исто така помеѓу спонзорите е и компанијата Дим-Метал до Неготино. Од Општина Неготино, за жал не добивме финансиска поддршка, иако фестивалот на некој начин ја промовира целата општина, раскажува Александар.
Веќе се најавени и музичките гости кои ќе настапат на фестивалот, на први август. Коки Бенд и Благица, легендарната рок група ,,Галија” и диџеј Були ќе ги забавуваат присутните.
Ќе има штандови со скара и пијалоци, настанот ќе трае еден ден, но од наредната година има тенденција да стане тридневен фестивал. Од организацијата порачаа дека сите љубители на добра музика и забава се добредојдени на фестивалот кој за првпат се случува во историјата на Војшанци.
Вики Клинчарова
