Најновата студија покажа дека во ледените наслаги на површината на Марс може да има некои микроорганизми како вонземски форми на живот.
Ледените наслаги би можеле да ги заштитат таквите форми на живот од ултравиолетовото зрачење на Сонцето, кое го прави животот речиси невозможен на површината на таа планета, пишува британски Индипендент.
Но, новата студија покажува дека таквите форми на живот треба да бидат доволно длабоко, во доволно дебел слој мраз за да ги заштити од ултравиолетовото зрачење, но во исто време тие ќе треба да бидат лоцирани и доволно плитко за да добијат видлива светлина за фотосинтеза.
Како дел од студијата, научниците создадоа модел за да им покаже дали постои таква точка, со оглед на прашината и видот на мразот пронајден на Марс.
Во зависност од процентот на прашина што ја содржи мразот, површината на која би можел да има живот би била длабока меѓу пет и 38 сантиметри, а доколку мразот бил почист, зоната погодна за живеење би била поголема – на длабочина од 2,15 до 3,10 метри.
Прашината во мразот повремено ќе го стопи мразот, што значи дека ќе има доволно течна вода за да придонесе за фотосинтезата неопходна за опстанок на таквите форми на живот.
Истражувачите предупредуваат дека новата студија не значи дека тие навистина постојат во тие ледени области, но веруваат дека тие треба прво таму да се бараат.
Ги повикаа колегите во иднина тоа да стане клучна локација во потрагата по живот на Марс, бидејќи може да биде најпристапното место за негово откривање.
Написот со наслов „Потенцијал за фотосинтеза на Марс во снег и мраз“, беше објавен во списанието Nature Communications Earth & Environment.
