Министрите за надворешни работи на НАТО денеска се состануваат за да разговараат за тоа како да се постави воената помош за Украина на долгорочна одржлива основа, вклучително и предлог за петгодишен пакет од 100 милијарди евра кој ќе обезбеди поддршка за Киев доколку Доналд Трамп се врати во Белата куќа.
Предлогот на генералниот секретар Јенс Столтенберг ќе и даде на западната алијанса поголема улога во координирањето на снабдувањето со оружје, муниција и опрема за Украина, велат дипломатите. Планот ќе биде разгледан на дводневната средба во Брисел по повод одбележувањето на 75-годишнината од Северноатлантскиот договор и подготовката за самитот во Вашингтон во јули.
Состанокот ќе покаже колку се спремни европските сојузници да ги поддржат воените напори на Киев против Русија во време кога американскиот Конгрес го блокираше пакетот воена помош од 60 милијарди долари. Според плановите, НАТО ќе ја преземе координацијата од групата Рамштајн, ад хок коалиција предводена од САД, во случај Трамп да ја прекине воената помош за Украина доколку повторно стане претседател на САД.
НАТО како организација досега се фокусираше на обезбедување неборбена поддршка за Украина со цел да се избегне ескалација на тензиите со Русија, додека нејзините членки му обезбедија на Киев милијарди долари оружје на билатерална основа.
НАТО зазеде став дека Украина не може да се приклучи на алијансата додека трае војната со Русија, но дека ќе стане членка во одреден момент во иднина.
Одлуките во НАТО се носат со консензус на 32 членки. Средбата се одржува во време кога алијансата бара наследник на Столтенберг, кој ја извршуваше функцијата генерален секретар речиси десет години. Холандскиот премиер Марк Руте е поддржан од 90 отсто од земјите-членки, вклучувајќи ги САД, Франција, Велика Британија и Германија.
Сепак, Унгарија e против неговиот избор поради неговите критики на премиерот Виктор Орбан и, од неодамна, на романскиот претседател Клаус Јоханис.
