Наташа Совраноски, 25-годишната жена и мајка на едногодишно девојче, која по 25 дена откако исчезна во Штутгарт, Германија, беше пронајдена мртва во шума, беше погребана пред четири дена. Нејзиното семејство, со македонско потекло, а кое живее во Германија, соопшти дека погребот се одржал во Синделфинген и се заблагодарија на сите кои дошле на последното испраќање на Наташа.
Истовремено, се огласија и од германското здружение ,,Frauen helfen Frauen e.V. Calw” кое им пружа поддршка на жените жртви на семејно насилство, и порачаа да не се толерира насилството, бидејќи секој трет ден во Германија се случувало жена да биде убиена од нејзиниот партнер.
-Запрепастени сме и сочувствуваме со загубата на 25-годишната Наташа од Бад Тејнах Завелштајн. Младата жена и мајка, која беше исчезната од втори септември 2024 година, беше пронајдена мртва на 27ми септември, како последица на насилство.
Јавното обвинителство потврди дека осомничениот бил во врска со Наташа. Ваквите ужасни настани не потсетуваат сите колку е важно да се залагаме за правата и заштитата на жените за да се осигураме дека насилството врз жените нема да се толерира!
На секои четири минути една жена доживува насилство од нејзиниот партнер или поранешен партнер. Секој трет ден жена во Германија е убиена од нејзиниот партнер или поранешен партнер.
Сепак, насилството во сопствените четири ѕида премногу често се премолчува во јавните дебати и се отфрла како приватна судбина.
Престанете со насилството врз жените! Престанете да убивате жени! Престанете со фемицидот! Жените од Управниот одбор и вработените во здружението им помагаат на жените со безрезервна поддршка, наведено е во соопштението кое го објави германското здружение ,,Frauen helfen Frauen e.V. Calw”.
Инаку, во периодот кога Наташа исчезна, ,,Фокус” разговараше со нејзиниот татко Милчо Совраноски, кој живее во Охрид. Тој појасни дека таа живеела заедно со нејзниот 45-годишен партнер, со кого имаат и ќерка, и кој бил Германец по потекло. Кажа дека имале меѓусебни недоразбирања, а Наташа била единствената која заработувала, додека партнерот не бил вработен. Претпоставуваше дека самата заминала поради проблемите со партнерот, и дека наскоро ќе се врати по ќерката.
На 27-ми септември во германскиот полициски билтен се објави веста дека телото на Наташа било пронајдено во шума, и се истражувало дали се работи за убиство. Исто така, од таму соопштија дека бил притворен 45-годишен маж, кој бил осомничен за убиство од небрежност.
Тогаш таткото на Наташа ни изјави дека се уште немаат информација што точно се случило, и дека со мајката на Наташа, која е негова поранешна сопруга, ќе се борат да добијат старателство над ќеркичката на Наташа, но и ќе бараат правда за нивната ќерка.
Вики Клинчарова