Адора инженеринг 12 месеци е сопственик на топланите Исток и Запад за кои има платено 9,26 милиони евра, но, според сопственикот Ванчо Чифлиганец компанијата сѐ уште не може да го добие владението со истите .
– Мене насила ме тераат државни институции да потпишам дека ги давам под закуп топланите, но не се споменува исплатата на долговите од 550.000 евра за кои не се знае каде се. Се бара закуп во смисла на управување со топланите, а кредитите да продолжи да ги отплаќа Адора. Адора е спремна да направи купопродажен договор и да го продаде имотот за 8,8 милиони евра од кои 7 се отплата на преостанатиот кредит, објаснува Чифлиганец, во СТУДИО 10 на ТВ24 .
Чифлиганец вели дека се надева оти топланите функционираат оти тој воопшто не влегол таму и додава дека купиле „магла и ветер“, а бизнисмените сакаат да работат во Македонија, но под услови на рамноправност и фер односи во државата, без фаворизирање поради политички интереси.
– Јас се согласувам дури и само да ми се покријат финансиските загуби и ќе им ги предадам топланите на оние кои бесправно ги користат, вели Чифлиганец.
Тој вели дека поради тие долгови за првпат во 45 години кариера ќе мора да потпише негативна годишна сметка.