Голем број на регионални музичари ги најавија своите предновогодишни настапи пред публиката во Скопје. По Аца Лукас, кој ќе им пее на скопјани на 29-ти декември во Арена Борис Трајковски, претпразничен концерт или голема балканска журка, како што појаснува организаторот, ќе имаат и Реља Поповиќ, Пајак, Сенидах и Клинац.
Тие ќе настапат на 24-ти декември во А1 Арена, а најавени се дополнителни гости кои ќе бидат изненадување за публиката. Влезниците за концертите на Реља и Лукас се продаваат по цена од 600 денари. Покрај нив, на 25-ти декември во хотел Александар Палас во Скопје, празничен концерт ќе одржи и Саша Матиќ, а влезниците се продаваат по 1.000 денари.
И за новогодишниот дочек веќе неколку српски музичари го потврдија настапот во Скопје. Теа Таировиќ и Адил ќе пеат во угостителски локали, а влезниците се продаваат по цена од 3.000 денари. -По сите случувања со пандемијата, конечно дојде време да се вратиме во реалноста.
За новогодишните празници секој сака забава, а ние токму тоа го нудиме- велат од Балкан Медиа Продукција, кои се организатори на концертите.
Вики Клинчарова
