Македонските државјани кои беа евакуирани од Израел пристигнаа денеска околу 15 часот со бесплатен авионски превоз на Меѓународниот аеродром „Скопје“.
Авионскиот превоз со чартер лет, на релација Тел Авив – Скопје, беше организиран согласно одлуката донесена од страна на Владата, заради евакуација на сите државјани на Република Северна Македонија кои сакаа да го напуштат Израел и кои побарале да се вратат во земјава.
Во авионот на Ер Србија имаше вкупно 133 патници, од кои повеќето македонски државјани, но имаше и државјани на Србија и Црна Гора, кои ќе го продолжат патувањето од Скопје до Белград.
Како што соопштија вчера од Владата, во услови на целосно откажани летови и блокиран авио-транспорт со Израел, предизвикот за организирање на овој чартер лет е надминат преку соработка со „Air Serbia“, а трошоците за летот ќе бидат покриени од Буџетот.
Министерот за надворешни работи Бујар Османи вчера на прес-конференција информира дека од Израел досега се вратени 60 македонски државјани, од вкупно 150 кои побарале помош, а за денеска, како што кажа, се очекува да бидат вратени уште 90 граѓани.