Околу 900 земјотреси го погодија јужниот дел на Исланд денеска, соопштија властите, покрај десетиците илјади потреси што го погодија регионот во последните недели додека земјата се подготвува за можна вулканска ерупција.
Речиси 4.000 луѓе беа евакуирани во текот на викендот.
– Во моментов се соочуваме со огромна неизвесност: дали ќе има ерупција и, ако е така, каква штета ќе дојде – изјави Метју Џејмс Робертс, раководител на одделот за истражување во Исландската метеоролошка служба.
Жителите на градот Гриндавик опишаа како ги напуштиле своите домови во раните утрински часови во саботата додека земјата се тресела, патиштата пукнале и зградите претрпеле структурни оштетувања.
Ханс Вера, 56-годишен Белгиец кој живее на Исланд од 1999 година, рече дека куќата на неговото семејство постојано се тресела.
– Постојано се тресеше, па не можеше да се спие – изјавил Вера, која со семејството привремено се преселил во предградијата на главниот град Рејкјавик.
– Не се само луѓето во Гриндавик шокирани од оваа ситуација, (туку) цел Исланд – додаде тој.
Речиси сите 3.800 жители на градот успеале да најдат сместување кај членовите на семејството или пријателите, а само 50-70 луѓе биле сместени во центрите за евакуација, изјави претставник на спасувачките служби.
На некои евакуирани во неделата им беше дозволено накратко да се вратат во градот за да донесат документи, лекови или домашни миленици.
– Треба да го паркирате автомобилот на пет километри од градот и има 20 автомобили, огромни автомобили на спасувачки тим, 20 полицајци, трепкачки светла, едноставно е нереално, како воена зона или нешто слично, тоа е многу чудно – рекол Вера.
Полуостровот Рејкјанес е вулканско и сеизмолошки жариште југозападно од главниот град. Фонтаните од лава се појавија во март 2021 година од пукнатина во земјата долга помеѓу 500 и 750 метри во вулканскиот систем Фаградалсфјал во провинцијата.
Вулканската активност во областа траела шест месеци таа година, привлекувајќи илјадници Исланѓани и туристи.
Тринеделна ерупција се случи во август 2022 година во истата област, по што следеше уште една во јули оваа година.
