Министерството за внатрешни работи се огласи со демант по повод настанот во ОУ „Страшо Пинџур“ Карбинци, штипско, кога регионалната ТВ Стар објави дека се случил обид за киднапирање на две деца во училишниот двор, и истиот бил спречен.
– МВР најостро ги демантира шпекулациите кои денеска се проширија по одредени портали, локални телевизиски станици и социјалните мрежи за наводен спречен обид за грабнување на малолетно лице во училишен двор во општина Карбинци.
Според официјалната пријава до полицијата: Денеска (05.12.2023) во 09.52 часот во СВР Штип од Основно училиште во Општина Карбинци е пријавено дека околу 09.30 часот во училишниот двор со патничко возило „голф“ дошло младо машко лице, кое според пријавеното, поканило ученичка да влезе во неговата кола за да одат на кафе, но таа веднаш се вратила во училиштето и пријавила кај директорката.
Се работи на расчистување на случајот. Пласирањето на ваквите шпекулации, од кои дел и во дневно-политички цели, е со цел да предизвикаат паника, вознемиреност, постојано чувство на страв и несигурност кај граѓаните. Апелираме до граѓаните да не наседнуваат на вакви шпекулации. Исто така, им благодариме на медиумите кои ги проверуваат информациите во надлежните институции.-наведено е во демантот.
Претходно, во изјава за телевизијата и директорката на училиштето Наталија Костова кажа дека се случил обид за киднапирање на две деца, едно од македонска и едно од турска националност.
Исто така, и градоначалникот Виктор Паунов, во училишниот двор даваше изјава за медиуми, и посочи дека станувало збор за две деца.
Вики Клинчарова