МВР побарало да се одложи судењето за „Диво Насеље“

by fokus 12:40
12:40

На барање на Министерството за внатрешни работи рочиштето од продолжението на судскиот процес за случајот „Диво Насеље“, кое беше закажано за денеска, кога навршуваат точно две години од настаните во кумановската населба, е одложено.

Од Кривичниот суд за „Мета“ потврдиле дека судијката Верка Петковска ги известила странките во случајот – обвинителството, обвинетите и нивните адвокати – дека на барање на МВР денеска нема да се одржи продолжението од судскиот процес и дека рочиштетот е презакажано за 11 мај.

- Advertisements -

Од МВР засега нема информација од кои причини побарале одложување на денешното рочиште од „Диво Насеље“.

Инаку, судењата за овој случај, кои се одржуваат во големата сала на Врховниот суд, се проследени со силно полициско обезбедување, а сите што присуствуваат на рочиштата поминуваат низ засилен безбедносен протокол и детално се претресуваат на влезот во судот.

Денеска навршуваат точно две години од настаните во Диво Насеље, каде во борбите со вооружена терористичка група загинаа осум припадници на специјалните полициски сили, а 37 беа ранети. Во полициската акција беа убиени и 10 членови на терористичката група, која броела околу 40 лица.

Судскиот процес за „Диво Насеље“ почна на 9 февруари минатата година.

Поврзани новости