Судскиот совет одолговлекува и не постапува по Извештајот кој е изготвен од нивна страна и јавно објавен на веб страницата на Советот и покрај укажувањата и писмените дописи за констатирани неправилности во работата на Основниот суд Куманово, информираше Министерството за правда.
„Судскиот совет беше во работна посета на Основниот суд Куманово на 1 февруари годинава и подготви Извештај каде се констатирани низа нарушувања на угледот на судиската функција, направени се груби повреди на начелото на недеискриминација по било која основа,користење на несоодветен вокабулар, навреди и омаловажувања на вработените од страна на в.д претседателот на судот како и злоупотреба на АКМИС системот, кое во голема мера влијае на односите и работењето на судот“, соопшти Министерството за правда.
Според Министерството за правда со оглед дека Извештајот е јавно објавен , министерот за правда Кренар Лога на 11 април испрати писмен допис до Судскиот совет во кој се бара преземање на соодветни мерки или дејствија по однос на констатираните наводи.
„Особено заради тоа што разгледувањето на Извештајот беше на дневниот ред на седница на Судскиот совет одржана на 13 март. Во Извештајот се наведени и злоупотреби на АКМИС системот, исклучување на одредени судии од автоматската распределба на предмети.Од увидот на предметите во работната група констатирано е долго траење и одолговлекување на постапката, неуредно и неажурно верификување на предметите во АКМИС системот“, информираше Министерство за правда.
Од Министерството велат дека од Судскиот совет добиле известување на 12 април дека дописот е доставен на запознавање и понатамошна надлежност и постапување до координаторот за следење на работата на Основниот суд Куманово, членот на Советот Ханиф Зендели.
„Одговор не беше добиен,по што министерот за правда Кренар Лога на 22 јуни испрати повторно до Судскиот совет ургенција за постапување по барањето за состојбите констатирани во Извештајот . Од изнесените 8 точки, 7 се однесуваат на состојбите во судот за констатирани нарушени меѓучовечки односи и некоректен однос на ВД претседтаелот на судот кон одредени вработени. На 29 јуни од заменик претседателот на Судскиот совет Ханиф Зендели доставен беше одговор дека е изготвен дополнителен извештај кој е потребно да се разгледа на седница на Судскиот совет по што ќе не информираат за констатираната состојба“, соопшти Министерството за правда.
Од Министерството за правда велат дека уште еднаш го повикуваат Судскиот совет да постапи согласно своите надлежности, бидејќи неказнувањето на вакви случаи ќе доведе до дополнително нарушување на угледот на Советот, а со тоа и намалување на довербата во правосудството.
„И натму ќе останеме транспарентни и ќе ја информираме јавноста за сите состојби со кои се нарушува угледот и довербата во правосудството“, соопшти Министерството за правда.