Претседателот на ВМРО-ДПМНЕ, Христијан Мицкоски на вчерашната конференција на УМС на ВМРО-ДПМНЕ во Велес коментирајќи го случајот со Онкологија рече дека секаде во светот, и во други држави има случаи каде ќе има недостатоци на системот и грозоморни исклучоци на брутално кршење на правилата и законите.
-Но, функционалните држави се разликуваат од нас по начинот на кој тие реагираат и постапуваат откако ќе излезе ваков скандал и одговорноста која мора да ја има. А, што направи оваа власт? Влезе обвинителството не со истрага, туку со предистрага, а истиве кои профитирале на грбот на најзагрозените сега се уште се во состојба да работат. Повторно одредуваат терапија која ја краделе и во секој час може да го повторат делото, рече Мицкоски.
Тој додаде дека за ваквите случаи треба да одговараат реалните виновници, односно креатори на истите.
-Воедно доста со навреди на интелигенција дека за големите катастрофи во Македонија може да биде виновен кабелот, кочниците, или сестрите, а не и оние што потпишуваат договори и даваат насоки, рече Мицкоски.
