Претседателот на ВМРО-ДПМНЕ, Христијан Мицкоски по повод денот на Христовото раѓање Божик упати честитка до припадниците на католичката вероисповед и до скопскиот бискуп и апостолски егзарх во државава Киро Стојанов.
– Ви посакувам на овој најголем христијански празник многу спокој, љубов, здравје и среќа во вашите семејства. На овој ден, нека не обедини Христово учење за хуманост, меѓусебна почит и пожртвуваност, нека не обединат традиционалните вредности кон кои се стремиме како општество, наведува Мицкоски во честитката.
Нашата заедничка татковина Република Македонија, дополнува Мицкоски, ги живее можеби најтешките моменти во својата историја како независна држава, но надежта не смее да згасне во нашите срца.
– Дојде време кога треба да размислуваме што ние како поединци можеме да направиме за татковината, за да се оствари нашиот заеднички стремеж за просперитетна и успешна Република Македонија во која не само ние туку и нашите, деца внуци, правнуци ќе ги поминат своите животи. Ни престојува година во која граѓаните на Република Македонија треба да донесат сериозна одлука за тоа во каква држава сакаат да живеат, во оваа година ѕвезда водилка нека е основното христијанско учење, потрагата по праведноста и вистината. Ние веруваме во принципи, правда, промени, и со силна верба за успех и нова шанса за Македонија. Нека е вековит и честит овој голем христијански празник Рожденство Христово, Божик. Христос се роди, Навистина се роди!, стои во честитката од Мицкоски и ВМРО-ДПМНЕ.