Лидерот на ВМРО-ДПМНЕ, Христијан Мицкоски во целокупниот драматичен ден поврзан со собраниската седница, на која требаше да се гласа за недоверба на влада, а која никако да почне, завршил на операција на скопската Клиника за торакално-васкуларна хирургија, потврди за „Фокус“, директорот Неџат Јакупи.
„Мицкоски дојде кај нас на клиниката околу 17 часот и имаше операција на бенигна бемка на вратот. Тој дојде бидејќи бемката му правела одредени проблеми. Операцијата траеше 45 минути, при што пред 19 часот ја напушти клиниката и веќе е на лекување во домашни услови. Не е ништо страшно“, истакна доктор Јакупи.
Претходно, лидерот на ВМРО-ДПМНЕ објави статус и фотографија на која можеше да се забележи дека имал некаква интеревенција.
Динамичен ден. Киднапиран пратеник, криминал, уцени, срам, и нормално најголемата желба на СДСМ-ДУИ да ме немало во политиката…после 45 минути лесна хируршка интервенција која беше закажана пред кампањата, ја одолговлекував поради кампањата и денес дојде редот
Денешниот ден во Собранието помина во драматична атмосфера, неколку пати се откажа собраниската седница, двајца пратеници од ВМРО-ДПМНЕ во скафандери изолирани во посебна кабина со саати чекаа да почне седницата, додека пак пратеникот од БЕСА, Кастриот Реџепи воопшто не се појави, па поради него немаше доволно кворум за да се гласа за недоверба на владата.