Ставањето точка на дневен ред за утврдување на предлог за избор на уставни судии е преседан, бидејќи во 30-годишниот плурализам првпат се случува Комисија да не ја заврши расправата по точката, а да испрати извештај и тој да се смета за релевантен врз основа на којшто ќе се дискутира на пленарна седница, изјави денеска координаторот на пратеничката група на ВМРО-ДПМНЕ Никола Мицевски.
Мицевски најави дека пратеничката група на ВМРО-ДПМНЕ ќе разгледа можност за поднесување на интерпелација, но и одредени кривични пријави за, како што рече, „сите оние кои се инволвирани во оваа постапка“.
Тој додаде дека расправата по третиот предлог-кандидат во Комисијата се уште не е завршена и точката уште не е утврдена, односно, според него, во целиот случај се постапува неделовнички.
-Претседателката на Комисијата за прашања на избори и именувања е злоупотребена и е ставен потпис на извештај којшто го измислиле други умни глави, а таа требала да го реализира, ставајќи го својот интегритет за ваква работа – рече Мицевски.
Според него, станува збор за „класично изгирување на процедурата“ и „класично кршење на Уставот“.
-По доаѓање на ВМРО-ДПМНЕ на власт, целата постапка на злоупотреба на изборот на уставни судии повторно ќе биде разгледана – рече Мицевски.