Министерот за одбрана, Владо Мисајловски рече дека Македонија го исполува условот на НАТО за издвојување на минимум два проценти за одбрана.
Тој најави модернизација, опремување на Aрмијата, како и зголемување на стандардот на вработените и пополнување со помладите во Армијата, како три столба кои се приоритет на Министерството и на АРМ.
-Во однос на буџетот би сакал да информирам и да истакнам дека условот за минимум 2 проценти наменет за одбраната е испочитуван. Гледано во пари тој изнесува 329 милиони евра, од кои 32 проценти, односно 106 милиони евра се наменети за модернизација и опремување на Армијата. Гледано во однос на 2024 година тоа се 18 милиони евра повеќе, истакна Мисајловски.
Во рамките на модернизацијата и опремувањето на АРМ, тој рече дека испораката на сите 96 „ЈЛТВ“ возила и возилата „страјкер“ треба да заврши до крајот на годината, а исто така до крајот на 2025 треба да пристигнат и нарачаните системи „Боран“ и „Мистрал“.
„Да најавам дека в година почнуваме постапка за прием на нови 300 професионални војници и тогаш ќе ги објавиме сите овие податоци, 300 нови професионални војници и секој оној што сака да биде дел од Армијата, се разбира, ќе го види огласот и ќе се пријави. Со овој начин ги зголемуваме припадниците во Армијата, но и ја подобруваме нашата борбена готовност. Исто така, продолжуваме со прием на 60 граѓани со цивилни факултети, ќе завршиме и со постапката за прием на питомци и она што се дополнителни вработувања за оние категории најпотребни во Министерството за одбрана“, рече Мисајловски.
Тој додаде дека в година ќе се исплаќаат тековно сите обврски кон вработените. Последните шест месеци Министерството исплатило 99 проценти од наталожените обврски кон вработените. Како многу важен столб, Мисајловски го истакна и човечкиот капацитет за кој рече дека е врвен приоритет, кој е вклучен во стандардот на вработените и пополнување со помладите во Армијата.
