Северна Македонија ги исполни сите демократски услови за почеток на пристапните преговори со ЕУ, но се прејде во навика земјата „да се шутира“ кога и да му одговара тоа некому, изјави хрватскиот претседател Зоран Милановиќ, откако официјална Софија ги осуди неговите изјави за бугарската политика кон европската интеграција на земјата.
-Тоа не е во ред. Таа држава и тој народ досега платија доста висока цена. Тие играат по правилата и се за пример. Ги исполнија сите демократски услови што човек може да ги замисли, а тоа се повеќенационални заедници во кои има многу Албанци и таа соработка е за пример – рече денеска Милановиќ.
Хрватскиот претседател потсети дека земјава, меѓудругото, го променила и името на барање на Грција.
– Конечно ги примија во друштвото на мртвите поети и сега доаѓа оној услов кој навистина е влегување во интимниот простор. Тоа не се прави во 21 век. Тоа апсолутно не е основа за утрешниот соживот во Европската Унија – рече Милановиќ, додавајќи дека земјава е жртва на недостиг на интерес и основна емпатија.
Инаку, поради ваквиот негов став, хрватската амбасадорка во Софија, Јасна Огњановац, вчера е повикана на разговор во бугарското МНР.