Поранешната германска канцеларка Ангела Меркел изјави дека верува оти војната во Украина би започнала порано и „веројатно би била полоша“ доколку Киев го започнал својот пат кон членство во НАТО во 2008 година.
– Ќе гледавме воен конфликт и порано. Мене ми беше сосема јасно дека рускиот претседател Владимир Путин нема да стои со скрстени раце и да гледа како Украина се приклучува на НАТО. И тогаш, Украина како земја сигурно нешe да биде подготвена како во февруари 2022 година – изјави таа за Би-Би-Си.
Во ретко интервју откако се повлече од политиката пред три години, Меркел изрази загриженост поради обновените закани на Путин за употреба на нуклеарно оружје.
– Мораме да направиме се што е можно за да ја спречиме употребата на нуклеарно оружје. За среќа, Кина неодамна зборуваше за тоа. Не треба да нè парализира стравот, но мора да признаеме дека Русија е најголемата, или веднаш до САД, една од двете најголеми нуклеарни сили во светот. Потенцијалот е застрашувачки – предупреди поранешната германска канцеларка.
Таа изјави дека за време на нејзиниот мандат направила се што е во нејзина моќ за да обезбеди мирни средства за соработка со Русија и дека Путин „започнал инвазија на Украина“ само неколку месеци откако таа ја напуштила функцијата.
Би-Би-Си објави дека за време на владата на Ангела Меркел, Германија и нејзините големи индустрии станаа зависни од Москва, бидејќи Германија изгради два гасоводи директно поврзани со Русија.
Меркел објасни дека има два мотиви во однос на гасоводите: германски бизнис интереси, но и одржување мирни односи со Русија.
Таа додаде дека се обидела да ги задржи руските напади врз Украина користејќи дипломатија и преговори, кои, како што наведе, „на крајот не успеале“.
„Нова ера во односите на Европа со Русија, за жал, започна по целосната инвазија на Украина“, нагласи германската канцеларка.