Италијанската премиерка Џорџа Мелони рече дека САД немаат намера „насилно да ги анектираат“ Гренланд и Панамскиот канал, толкувајќи ги изјавите на Доналд Трамп како порака насочена кон Кина.
На нејзината годишна прес-конференција во Рим, таа рече дека „исклучува дека САД насилно ќе припојат територии од нивни интерес во наредните години“, нагласувајќи дека Кина е многу заинтересирана за овие две територии.
„Изјавите на Трамп првенствено претставуваат порака насочена кон другите големи сили“, рече Мелони, која смета дека ова не е „непријателско допирање“ на САД кон овие земји.
„Зборуваме за две територии каде што влијанието на Кина расте во последните години“, рече Мелони.
Таа го посети идниот американски претседател во саботата, но не потврди дали ќе присуствува на неговата инаугурација на 20 јануари.
Зборувајќи за Украина, која силно ја поддржува во војната против Русија, Мелони рече дека не предвидува намалување на американското учество.
„Искрено, не гледам дека САД се повлекуваат“, рече Мелони, додавајќи дека Трамп рекол: „Бидејќи сакаме мир, нема да ја напуштиме Украина“.