Меѓународниот суд на правдата во Хаг денеска му нареди на Израел веднаш да ја прекине воената операција во градот Рафах во јужниот дел на Појасот Газа.
Судот, исто така, му нареди на Израел да го отвори граничниот премин Рафах со Египет за да дозволи прилив на повеќе хуманитарна помош.
„Израел мора веднаш да ја прекине својата воена операција или каква било активност во Рафах што може да донесе услови за живот на Палестинците во Газа што би довело до нивно физичко уништување целосно или делумно“, рече Наваф Салам, претседател на Меѓународниот суд на правдата.
Тој додаде дека Израел мора да преземе ефективни мерки за да обезбеди непречен пристап до Појасот Газа за која било истражна комисија, мисија за утврдување факти или истражно тело наложено од Обединетите нации да ги испита наводите за геноцид, пренесува Ал Џезира.
На Израел, исто така, му беше наредено да го информира МСП во рок од еден месец за напредокот во спроведувањето на мерките што му беа издадени.
На 9 мај, воениот кабинет на Израел одобри „ограничено проширување“ на воената операција во Рафах, дом на повеќе од милион Палестинци кои избегаа од конфликтот во други делови на Појасот Газа.
