Поради големите снежни наноси во Галичник, медицинските екипи не биле во можност да пристигнат и да му пружат помош на старецот Павле, по што била организирана акција во која бил вклучен хеликоптер на МВР и припадници на специјалните единици.
Акцијата била успешно изведена, а Павле бил пренесен во Скопје и хоспитализиран на клиника.
Од Месната заедница јавно се заблагодарија до Стојанче Ангелов, директор на Центарот за управување со кризи, до МВР и до САЕ Тигар, но истовремено порачаа дека е неопходно отворање на зимски пат до Галичник преку село Јанче, со делница од само пет километри, бидејќи тоа ќе ја чини државата помалку отколку да се прават вакви ризични и итни интервенции.
-Во невозможност медицински екипи да пристигнат во Галичник поради големи снежни наноси, извлекувањето е направено со имобилизација и повлекување од воздух. Дедо Павле безбедно пристигна во Скопје, згрижен е во Болницата 8ми Септември и му посакуваме брзо закрепнување!
Месната заедница Галичник, сака да потенцира и укаже до сите надлежни институции дека отвoрањето на зимски пат до Галичник, преку село Јанче, Општина Маврово Ростуше, е неопходност.
Силно апелираме до надлежните институции, во прв ред Јавното претпријатие за државни патишта и Министерството за транспорт и врски оваа делница од само 5 километри да се отвори.
Истовремено потсетуваме дека постојниот пат Маврово – Галичник е во категорија регионални патишта за кои е задолжително зимско одржување. Поради географската положба и ориентација, свесни сме дека одржувањето е невозможно во зимски услови. Меѓутоа, токму затоа е потребно да се овозможи алтернативен пристап од јужната страна, отворајќи пат од селото Јанче – делница од само 5 километри! Убедени сме дека тоа државата ќе ја чини помалку отколку вакви инцидентни и итни интервенции кои се тешки и ризични-порачаа од МЗ Галичник.
Вики Клинчарова
