Албанската владејачка коалиција ВЛЕН наскоро треба да го заокружи долгонајавуваниот процес на трансформација од коалиција во единствена политичка партија.
Според неофицијални информации на „Фокус“, внатрекоалициските дискусии и анализи засега одат во правец дека новата партија треба да има двајца претседатели, односно претседател и копретседател.
Иако се разгледуваше опцијата за еден лидер, како и моделите за ротирачки претседател и за колективно претседателство, сепак, најмногу аргументи имало за моделот со двајца претседатели, за што се земале во предвид и компаративни примери и искуства.
Како што велат високи партиски извори, претседател и копретседател на ВЛЕН треба да бидат првиот човек на Демократското движење и градоначалник на Чаир, Изет Меџити, и првиот човек на БЕСА и градоначалник на Тетово, Биљал Касами.
–Коалицијата е базирана на принципите на партнерство и не дозволуваме да не поделат дебати од типот кој повеќе тежи во коалицијата, но Меџити и Касами најмногу се издвојуваат според многу аспекти и логично е да бидат први луѓе на партијата – ни изјави функционер на ВЛЕН, кој доаѓа од БЕСА.
Инаку, Меџити и Касами важат за највлијателни индивидуалци во рамки на ВЛЕН, кои воедно имаат и најсилни структури на терен, со таа разлика што Меџити е доминантен во Скопје и скопскиот регион, а Касами во Тетово и тетовскиот регион.
За потсетување, Меџити не само што на локалните избори победи во матичната општина Чаир, што се сметаше за најважна битка во албанскиот блок, туку негов сопартиец победи и во Сарај, а ВЛЕН победи и во Арачиново.
Што се однесува до Касами, пак, тој победи во уште една исклучително важна општина за Албанците – Тетово, додека ВЛЕН победи и во тетовските рурални општини како Теарце, Желино и Боговиње.
Притоа, Меџити има посилна политичка тежина, меѓутоа Касами го прави битен фактот што е силен во тетовската област, која спаѓа во шестата изборна единица, од каде впрочем се влече поголема маса на гласови и се избирааат најголем број на пратеници-Албанци.
Поради сето тоа, сосема логичен развој на настаните е Меџити и Касами заедно да застанат на чело на ВЛЕН, која во себе интегрира уште неколку политички субјекти, фракции и авторитети.
Покрај ДД и БЕСА, во рамки на ВЛЕН е и Алтернатива на Зеќирија Ибраими (од Алтернатива доаѓа и собранискиот спикер Африм Гаши), како и фракцијата на Алијанса за Албанците предводена од Арбен Фетаи, формирана по заминувањето на Арбен Таравари во опозиција.
Потоа, дел од ВЛЕН е и движењето Арбериа, составено од поранешни истакнати пратеници на ДПА, како Беким Фазлиу, Орхан Ибраими, Мерал Ферати и други. Патем, не треба да се заборави дека оваа коалиција/партија има поддршка од Албин Курти, чиј претставник во ВЛЕН е пратеникот Беким Ќоку.
Портпаролот на ВЛЕН, Дритон Сулејмани, во изјава за „Фокус“ вели дека постои одлична соработка меѓу четирите партии и претставникот на Движењето Самоопределување, која, според него, се темели на взаемна доверба, целосна и динамична координација, како и на заедничка политичка платформа која ја доби довербата на Албанците во неколку изборни циклуси.
„Во рамките на оваа соработка веќе функционираат Централно раководство, медиа-центар и кадровска комисија, кои работат координирано и во заеднички интерес. Овие структури го одразуваат високото ниво на организација и сериозност со кое ВЛЕН ја гради својата политичка основа за стабилно и долгорочно ангажирање – вели Сулејмани.
Во однос на прашањето за претседател и лидерство на ВЛЕН, тој посочува дека тоа ќе биде разгледано преку „отворен дијалог и целосна соработка меѓу лидерите на партиите, со цел конечната одлука да ја рефлектира единственоста и заедничкиот дух што ја карактеризира ВЛЕН, со потребното внимание и без притисок на време“.
Влатко СТОЈАНОВСКИ