Заедничка заложба околу балансерот, освен етничката застапеност, е да има и квалитет при изборот. Бидејќи, реално, во минатото заради партиските вработувања бил запоставен квалитетот на администрацијата и од една и од другата заедница, рече Изет Меџити, прв вицепремиер и министер за животна средина, во вечерашното интервју во „Топ тема“ на ТВ Телма.
„И затоа цело време се бара да се реформира администрацијата и да биде достојна за новите предизвици, за евроинтеграција. Механизмот на балансерот кој во почетокот имаше ефект за правичната застапеност на помалите заедници на ниво на републиката, исто и за Македонците на ниво на општините. Во минатите години имаше доста случаи во кои балансерот не беше во функција на правична застапеност, туку на злоупотреба на ова и продлабочување на дискриминацијата. Бидејќи имаше случаи во кои Македонци се изјаснуваа како Албанци или како Турци. Или Албанците како помали заедници во зависност од тоа што се бараше за работното место. Но, тоа се однесуваше само до вработување. Потоа тој пак беше Албанец или Македонец, па сега заеднички заклучивме дека балансерот не е во функција на тоа што бил воведен како механизам“, изјави Меџити.
Како што нагласи првиот вицепремиер во владата, балансерот, со одлука, ќе се унапреди во Закон за правична застапеност и запазување на квалитетот при вработување.