Малолетник уби еден, а рани уште еден полицаец во БиХ

За трагична вест вечерва јавуваат медиумите од БиХ.

Во градот Босанска Крупа на западот од земјата, како што потврдил портпаролот на тамошната полиција, Аднан Бегановиќ, еден полицаец е убиен, а друг се бори за живот.

Нападот се случил во полициската станица. Убиен е водачот на смена, а уште еден полицаец е тешко ранет.

Бегановиќ потврдил дека нападот го извршил малолетник со ладно оружје, со нож.

Повредениот полицаец е во болница и лекарите се борат за неговиот живот. Малолетникот кој е осомничен за ова кривично дело е уапсен.

Бегановиќ не открил детали како мотивот, за да не го загрози текот на истрагата.

На терен се припадници на Специјалистичката единица, поголем број униформирани полициски службеници, како и инспектори на МУП на УСК.