Македонија нема да биде дел од Евровизија 2024 година, односно две години по ред нема да испратиме свој претставник на популарната музичка манифестација.
Причината, како и минатата година, била од економска природа, но и поради тоа што наредната година јавниот сервис требало да се фокусира на одбележување на 80-годишен јубилеј од постоењето на Македонското Радио, и 60 години јубилеј од постоењето на Македонската телевизија.
-Македонската Радио Телевизија ја информира јавноста за донесената одлука, идната година да не учествува на Изборот за песна на Евровизија што ќе се одржи во Малме, Шведска.
Ваквата одлука е во најдобар интерес на граѓаните, имајќи предвид дека Јавниот сервис идната година, со сите свои капацитети ќе се фокусира на одбележување на големиот јубилеј, 80 години Македонско Радио и 60 години Македонска Телевизија. Активностите за одбележување на големиот јубилеј ќе се одвиваат во текот на целата 2024 година.
МРТ на своите сервиси ќе ја пренесува манифестацијата, двете полуфинални вечери и големото финале-соопштија од јавниот сервис.
Вики Клинчарова