Македонија ќе земе учество на Детска Евровозија 2024, која годинава ќе се одржи во Мадрид, Шпанија на 16-ти ноември. Веќе е објавен повикот за аудиција на која ќе се избере претставникот, и тоа на 19-ти јуни, во едно од студијата на МРТ.
Објавени се и условите за учество на аудицијата.
-Maкедонската Радио Телевизија објавува Повик за аудиција на вокален интерпретатор за Јуниорски Евросонг 2024, кој оваа година се одржува во Мадрид, Шпанија.
Пријавените кандидати треба да се на возраст помеѓу 9 и 14 години на денот на финалната манифестација, 16 ноември 2024 година.
Кандидатите, апликациите ги поднесуваат на електронската адреса: jescmk@mrt.com.mk.
Сите кандидати треба да се државјани на Република Северна Македонија или да имаат регулиран престој во Република Северна Македонија. Пријавата треба да ги содржи основните податоци:
– Име и презиме
– Датум и место на раѓање
– Email адреса и контакт телефон на еден родител.
Учесниците на аудицијата ќе исполнат две композиции по сопствен избор на инструментална матрица.
Учесниците се обврзани со себе да донесат технички исправен носач на звук – УСБ (wav формат). Учесниците се обврзани да ги достават матриците и на меил адресата (jеscmk@mrt.com.mk). 24 часа пред аудицијата (wav формат).
Аудицијата ќе се одржи на 19 јуни 2024 (среда) со почеток од 10.00 часот во студијата на МРТ, а пријавувањето за аудиција е отворено од денот на објавување заклучно со 17 јуни, 2024 година, информираат од јавниот сервис.
Лани Детската Евровизија се одржа во Франција, а Македонија ја претставуваше Тамара Грујеска, која беше избрана на аудиција. Таа заврши на 12-то место.
Македонија беше една од шеснаесетте земји што учествуваа на првото издание на Детската Евровизија во 2003 година. Најдобриот резултат на Македонија досега е петтото место, во 2007 година со „Динг Динг Донг“ на Росица и Димитар и во 2008 година со „Прати ми СМС“ на Боби Андонов.
Најлошиот резултат, односно последното место Македонија го освои во 2015 година, со настапот на Ивана и Магдалена со песната ,,Плетенка”.
Вики Клинчарова
