Три деца биле нападнати со нож во областа Блу Маунтинс во Нов Јужен Велс, Австралија. Петгодишното дете починало, додека другите две деца и нивната 45-годишна мајка се во критична состојба.Жената била пронајдена со повреди за кои полицијата верува дека самата си ги нанела. Таа и двете преживеани деца биле пренесени во болниците Вестмид и Детската болница Вестмид.
Полицијата соопшти дека инцидентот се случил кај Валeј Хајтс, во близина на противпожарен пат. Жената таму го паркирала автомобилот.
Неколку велосипедисти кои минувале низ областа први ја забележале ситуацијата. Тие се обиделе да им помогнат на повредените и ги повикале итните служби. Еден од сведоците, Џули Сукар, за „Најн њуз“ раскажала дека видела жена како лежи во грмушките и бебе во седиште, додека друга жена се обидувала да помогне.
„Од другата страна имаше уште едно дете. Не сфатив веднаш дека се три деца. Сите само се обидуваа да помогнат“, раскажала таа.
Петгодишното дете починало пред да пристигнат медицинските екипи. Полицијата засега не соопштува мотив за нападот.
Заменик-комесарот на полицијата на Нов Јужен Велс, Питер Мекена, потврдил дека осомничената е мајка на децата.
„Веруваме дека сама си ги нанела повредите“, изјавил тој, додавајќи дека истрагата е во рана фаза.
Полицијата планира да ја обвини за убиство доколку преживее и се опорави од повредите опасни по живот. Според досегашните информации, местото каде што се случил нападот било избрано случајно.
„Изгледа дека локацијата била избрана случајно. Немам објаснување зошто е избрано токму тоа место“, рекол Мекена.
Таткото на децата бил известен за настанот. Во моментот на нападот бил на работа.
Мекена го опиша последниот викенд како еден од „најтрагичните 48 часа“ во неговата кариера. Во тој период во Нов Јужен Велс биле регистрирани четири тешки случаи на семејно насилство. Во сите случаи осомничените претходно не ѝ биле познати на полицијата поради семејно насилство, ниту имало изречени мерки за забрана на приближување.
„Не можеме да спречиме нешто за кое немаме информации. Но ова покажува дека вакви работи можат да се случат секаде и во секое време. Затоа ни е потребна помош од заедницата – ако сте загрижени за некого, известете нè“, рекол Мекена.
Според полицијата, во трите други случаи жртвите и осомничените исто така биле роднински поврзани. Станува збор за убиства во близина на Вага Вага, на плажата Бонди и во Мол Ривер, кај Тентерфилд.
Полицијата на Нов Јужен Велс повторно апелираше до луѓето кои се соочуваат со семејно насилство или се загрижени за некого да побараат помош.
„Ако некој се чувствува заробен во врска и мисли дека нема излез, ве молам знајте дека има“, рекол Мекена, повикувајќи ги жртвите и луѓето околу нив да се обратат до полицијата или до надлежните служби.
Тој додал дека полицајците кои интервенирале во овие случаи ќе добијат психолошка и професионална поддршка. Активистката Табита Акрет, чија ќерка била нападната со нож од поранешниот партнер, оцени дека случувањата во текот на викендот ја покажуваат сериозноста на проблемот со семејното насилство во Австралија.
Таа повика на поголеми вложувања во заштитата на жртвите, но и во превенцијата на семејното насилство.